La ruina dal chastè da Tschanüff nun es be il simbol principal dal cumün da Ramosch, ella es eir colliada fermamaing cull'istorgia dal cumün e da l'intera regiun. Üna tala ruina es però destinada d'ir plan a plan in muschna e mincha generaziun vezza damain da sia fuorma e sia particularità.

Il chastè - chi appartgnaiva üna jada a l'ovais-ch da Cuoira es stat devastà, da quai chi's sa, var 4 jadas. Forsa eir amo daplü, chi sà! Guerras, noschas situaziuns politicas, revoluziuns e daffata ün incendi tras la giuventüna indigena han buollà l'istorgia.

Tschanüff nun es però be our da la vista istorica ün object tuottafat particular. Eir la vegetaziun intuorn la ruina es speciala. Qua es per exaimpel la Ginestra dal Chastè, üna rarità in svizra.

Pigliond resguard sülla vegetaziun sto uossa la ruina gnir sgürada e conservada. Usche ch'ella resta per nus ed eir per las generaziuns venturas accessibla.